అంతరిక్ష సాంకేతిక విధానం ఆవిష్కరణలో కేటీఆర్
ఇప్పటికే 14 రంగాల్లో తెలంగాణ పురోగమించిందని, తమ తదుపరి ప్రాధాన్య రంగం అంతరిక్ష సాంకేతికత అని పరిశ్రమలు, ఐటీ శాఖల మంత్రి కేటీఆర్ అన్నారు. తెలంగాణ ఇకపై ఉపగ్రహాలు, రాకెట్లు, ఇతర అంతరిక్ష ఉత్పత్తుల తయారీలోనూ ముందంజ వేయనుందని చెప్పుకొచ్చారు.
ఇప్పటికే 14 రంగాల్లో తెలంగాణ పురోగమించిందని, తమ తదుపరి ప్రాధాన్య రంగం అంతరిక్ష సాంకేతికత అని తెలంగాణ పరిశ్రమలు, ఐటీ శాఖల మంత్రి కేటీఆర్ తెలిపారు. ఇప్పటికే ఐటీ, ఔషధాలు, వైమానిక ఉత్పత్తుల్లో తనదైన ముద్ర చాటుకున్న తెలంగాణ ఇకపై ఉపగ్రహాలు, రాకెట్లు, ఇతర అంతరిక్ష ఉత్పత్తుల తయారీలోనూ ముందంజ వేయనుందని చెప్పుకొచ్చారు. సోమవారం మెటావర్స్ సాంకేతిక పరిజ్ఞానంతో నిర్వహించిన కార్యక్రమంలో కేటీఆర్తో పాటు నీతి ఆయోగ్ సీఈవో అమితాబ్కాంత్, ఇస్రో చైర్మన్ సోమనాథ్ పాల్గొన్నారు. అలాగే ఇన్స్పేస్ చైర్మన్ పవన్ గోయెంకా, పరిశ్రమల ముఖ్య కార్యదర్శి జయేశ్ రంజన్ తదితరులు కూడా ఇందులో పాలుపంచుకున్నారు.
ఈ సందర్భంగా మంత్రి కేటీఆర్ మాట్లాడుతూ.. 2026 నాటికి స్పేస్టెక్లో దేశ వాటా 558 బిలియన్ డాలర్లకు చేరుతుందని, అందులో మెజారిటీ వాటాను తెలంగాణ దక్కించుకుంటుందని కేటీఆర్ అన్నారు. అంతరిక్ష సాంకేతికతలో అగ్రస్థానం పొందేందుకు తెలంగాణకు అన్ని అనుకూలతలున్నాయని చెప్పుకొచ్చారు. ఈ రంగంపై సమగ్ర అధ్యయనం, అవసరాలు, సాంకేతికత వంటి అంశాలను పరిశీలించి అత్యుత్తమ విధానాన్ని రూపొందించామని వెల్లడించారు. ప్రపంచ స్థాయి పారిశ్రామిక సంస్థలను ఆకర్షించడం ద్వారా దేశంలోని అంతరిక్ష సాంకేతికతల పురోగతితో పాటు చక్కటి పర్యావరణ వ్యవస్థను నిర్మించడానికి ప్రభుత్వం కృషి చేస్తుందని పేర్కొన్నారు. కార్యక్రమంలో భాగంగా కేటీఆర్ బ్లాక్ చైన్ ఆధారిత నాన్ ఫంజిబుల్ టోకెన్(ఎన్ఎఫ్టీ)లను విడుదల చేశారు. ఇటు వైమానిక సాంకేతికతలో తెలంగాణ ముందడుగు వేయడం సంతోషకరమని నీతి ఆయోగ్ సీఈవో అమితాబ్ కాంత్ అన్నారు. అంతరిక్ష పరిశ్రమ నుంచి ఆవిష్కరణలు రావాలని, వివిధ సమస్యలకు సాంకేతికలతో పరిష్కారాలు చూపాలని సోమనాథ్ పేర్కొన్నారు.
అసలు మెటావర్స్ విధానమంటే?
మెటావర్స్ విధానంలో మనుషులు కాకుండా వారిని పోలిన రూపాలు తెరపైన కనిపిస్తాయి. కార్యక్రమంలో పాల్గొనే వారి 360 డిగ్రీల ఫొటోలు, వీడియోల ఆధారంగా వారి సారూప్యతతో ఆ రూపాలను కంప్యూటర్ తెరపై ప్రదర్శించడం ఇందులోని ప్రత్యేకత. దీంతో వారే ప్రత్యక్షంగా పాల్గొన్న అనుభూతి కలుగుతుందని చెప్పవచ్చు..
