ఈ మధ్యకాలంలో వర్మ తీసే సినిమాలు జనాల్లో చర్చనీయాంశంగా మారుతున్నాయి.
తన రూటే సపరేటు అన్నట్లుగా ఉంటుంది రామ్ గోపాల్ వర్మ తీరు. ఈ మధ్యకాలంలో ఆయన తీసే సినిమాలు జనాల్లో చర్చనీయాంశంగా మారుతున్నాయి. అలాంటి కోవలోకి చెందిందే డేంజరస్ (మా ఇష్టం). భారతీయ తొలి లెస్బియన్ రొమాంటిక్ థ్రిల్లర్‌గా ఈ సినిమాను రూపొందించారు వర్మ. నిన్న హైదరాబాద్‌లో విలేకరుల సమావేశంలో పాల్గొన్న వర్మ.. చాలా విషయాలపై ఓపెన్ అయ్యారు. తనకు ఆసక్తి కలిగించిన అంశాలతోనే సినిమా చేస్తానని అన్నారు. పెద్ద పెద్ద స్టార్స్‌ని పెట్టుకొని భారీ బడ్జెట్ సినిమాలు తీసేంత ఓపిక, సామర్థ్యం తనకు లేవని నేరుగా చెప్పేశారు.
స్వలింగ సంపర్కులు కూడా మనుషులే. ఈ విషయమై మన దేశంలో ఎప్పటి నుంచో చర్చలు నడుస్తున్నాయి. వాళ్ళ ఫీలింగ్స్ కూడా అర్థం చేసుకోవాలని ఇప్పటికే కొన్ని సినిమాలు వచ్చాయి. కానీ నేను మాత్రం ఆ ఆంశం జోలికి పోకుండా ఇద్దరు అమ్మాయిలు స్వలింగ సంపర్కులు ఎందుకయ్యారు అనే చర్చకు తావివ్వకుండా.. వారి చుట్టూ ఓ క్రైమ్ డ్రామాను అల్లుతూ ‘మా ఇష్టం’ సినిమాను చేశా. ఇందులో ఇద్దరమ్మాయిల మధ్య రొమాంటిక్ డ్యూయెట్ ఉంటుంది. అలాగే యాక్షన్ సీన్స్ కూడా ఎక్కువగా ఉంటాయి'' అని రామ్ గోపాల్ వర్మ చెప్పారు.
