హైదరాబాద్‌‌కు మరో ఘనత.. టాప్-20 నగరాల్లో దక్కిన చోటు
వాణిజ్య రియల్ ఎస్టేట్ ప్రాజెక్టుల అభివృద్ధికి సంబంధించిన సస్టెయినబిలిటీ నిబంధనల అమలులో.. ఆసియా పసిఫిక్ ప్రాంతంలో హైదరాబాద్ నగరం టాప్ - 20లో స్థానం దక్కించుకుంది.
విశ్వ నగరంగా రూపుదిద్దుకుంటున్న తెలంగాణ రాజధాని హైదరాబాద్ మరో ఖ్యాతి పొందింది. ఆసియా-పసిఫిక్ ప్రాంతంలోని టాప్ 20 స్థిరమైన నగరాల్లో ఒకటిగా నిలిచింది. ఈ జాబితాలో హైదరాబాద్ 18వ స్థానంలో ఉండగా.. బెంగళూరు 14, ఢిల్లీ 17, ముంబై 20వ స్థానంలో నిలిచాయి. ఈ మేరకు ‘ఏపీఏసీ సస్టెయినబిలిటీ ఇండెక్స్ 2021’ వివరాలను రియల్టీ కన్సల్టెన్సీ సంస్థ నైట్‌ఫ్రాంక్‌ విడుదల చేసింది. పట్టణీకరణ ఒత్తిడి, వాతావరణ ప్రమాదం, కర్బన ఉద్గారాలు, ప్రభుత్వ కార్యక్రమాల ఆధారంగా 36 నగరాలకు ఈ సంస్థ రేటింగ్ ఇచ్చింది. ఆసియా-పసిఫిక్ ప్రాంతంలో సింగపూర్, సిడ్నీ, వెల్లింగ్టన్, పెర్త్, మెల‌బోర్న్.. వాణిజ్య రియల్ ఎస్టేట్‌లో మొదటి ఐదు గ్రీన్-రేటెడ్ నగరాల జాబితాలో ఉన్నాయి.
ఏపీఏసీ సస్టైనబిలిటీ ఇండెక్స్ 2021లో బెంగళూరు, ఢిల్లీ తర్వాత స్థిరమైన వాణిజ్య రియల్ ఎస్టేట్ ప్రాజెక్ట్‌ల్లో హైదరాబాద్ మూడో స్థానంలో నిలిచిందని... స్థిరమైన అభివృద్ధిని సృష్టించేందుకు, రియల్ ఎస్టేట్ రంగం నిబద్ధతకు ఇది మంచి సూచన అని నైట్ ఫ్రాంక్ ఇండియా సీఎండీ శిశిర్ బైజాల్ తెలిపారు. ప్రపంచ దేశాలు కర్బన ఉద్గారాల తటస్థ స్థితి(నెట్‌ జీరో)కి కట్టుబడి ఉండడం అన్నది పర్యావరణ అనుకూల భవనాలకు డిమాండ్‌ కల్పిస్తోందని అభిప్రాయపడ్డారు. భారతదేశంలో స్థిరమైన అభివృద్ధి వృద్ధిని కొత్త మార్కెట్ డైనమిక్స్ ప్రోత్సహించాయని చెప్పారు. భారతీయ డెవలపర్‌లు తమ అవసరాలకు అనుగుణంగా ఉత్పత్తులను పెంచుకోవడానికి ఇది తోడ్పడిందని పేర్కొన్నారు.
